Panaginip 

Sa malawak na mundong ating ginagalawan,
May mga pangyayaring di natin lubos inaasahan.
May mga taong sa panaginip mo lang nasilayan,
Ngunit isang araw, sila’y nasa iyong harapan.

Isang pagtatagpong kapwa di ninyo alam,
Parehong nagtataka, parehong nagugulumihan.
Parang matagal na kayong magkaibigan,
Magaan sa loob, tila puso’y nahimlayan.

Di inaasahang ang isang sandaling pagkikita
Ay may hatid palang pagbabagong kay lalim at kay bigla.
Pilit mang pigilan at magkunwaring walang nadarama,
Hindi kayang dayain ang pusong may kaba.

Nagtatanong ka, "Bakit ngayon? Anong dahilan?"
Ito ba'y pagkakamali na hahantong sa kasawian?
O baka naman ito na ang inaasam-asam,
Na akala mo noon ay natagpuan na, ngunit mali ang laman.

Sa gitna ng lahat, ang puso ko’y magpapasa-Diyos.
Alam kong sa Kanya, pag-ibig ay tunay at lubos.
Anuman ang kahihinatnan, wala akong pagsisisihan,
Pagkat naging totoo, tapat, at dalisay ang naramdaman.

Tuloy  Lang 

Tuloy lang ang buhay at huwag sumuko 

Kahit ilang beses man tayong mabigo 

Kahit ilang beses pa  tayong masasaktan 

At kahit ilang beses tayong magiging luhaan 

Tuloy lang tayo sa ating mga panagarap 

Tuloy lang tayo sa ating pagsisikap 

Hanggat hindi natin nakakamit  

Mga bagay na tila sa atin ay  ipinagkakait 

Tuloy lang tayong lumaban 

Kahit minsan tayo ay sugatan 

Isiping ang lahat ay  kasama sa buhay 

Upang tayo pa ay maging matatag at matibay 

Tuloy lang  na tayo ay umibig 

Hanggat tayo ay nakakaramdam ng  kilig 

Dahil ang ligaya sa puso 

Ay isang espesyal na regalo 

Na tayo lamang ang makakapagtanto 

Tuloy lang sa ating mga adhikain 

Kung ano mang makakapagpasaya sa atin 

Maigsi lang ang buhay kung tutuusin  

Kaya huwag na natin itong sayangin. 

Babae Ka, Hindi Babae Lang

Lahat tayo'y isinilang ng isang babae,
Sa sinapupunang tigib ng pag-ibig at gabi.
Katuwang ang Diyos sa kanyang pagpili,
Upang sa kandungan niya'y unang namalagi.

Babae ka—hindi babae lang,
Sa mundong ito, may silbi at saysay.
Dahil sa iyo, may buhay na umiiral,
Kahit minsan, halaga mo’y di nabibigyang-dangal.

Tandaan mo, anuman ang marating,
Saan mang sulok ng mundo dumating,
Isa lamang ang ating pinagmulan—
Sa babaeng sa atin ay nagsilang.

Kaya sila’y dapat nating pahalagahan,
Lalo na kung pag-aaruga’y di nila kinulang.
Hirap at pasakit, di matutumbasan,
Habambuhay silang mahalin at ingatan.

Sapagkat sa paggalang at pagmamahal,
Biyaya ng langit ang siyang magbubukal.

Simplehan Lang

Simplehan lang ang buhay

Upang sumaya sa mga simpleng bagay

Huwag nang humangad ng sobra

Lalo na kung hindi naman natin ito kaya

Sekretong hindi naman malupit

Kahit sino ay pwede itong makamit

Huwag lang tayong magpanggap

Kahit tayo na ay hirap na hirap

Simplehan lang ang mga bagay

Tamang sabay lang sa agos ng buhay

Upang hindi masyadong masaktan

Kung minsa’y dumating man ang kabiguan

Simplehan ang isipan

Ganun talaga ang buhay minsan

May salat, may ginhawa

May lungkot, may saya

Ang mahalaga ay nagpakatotoo ka

Lumaban ng patas at di namantala

Dahil diyan mararamdaman ang pagpapala

Na minsan ay matalinhaga at di kapani-paniwala